ஐ.டி.ஆர். ரீஃபண்ட் கிடைக்கலையா?… பணம் வராமல் போவதற்கான காரணங்களும், தீர்வுகளும்!

ஐ.டி.ஆர். ரீஃபண்ட் கிடைக்கலையா?… பணம் வராமல் போவதற்கான காரணங்களும், தீர்வுகளும்!

வரித் தாக்கலை (ITR) செப்டம்பர் 15-ஆம் தேதிக்குள் தாக்கல் செய்த பல வரி செலுத்துவோர், இன்னும் நிதியாண்டு 2024-25-க்கான வருமான வரி திரும்பப் பெறுவதற்காகக் காத்திருக்கின்றனர். பொதுவாக, பணத்தைத் திரும்பப் பெறுவதில் தாமதம் ஏற்படுவது வழக்கமான ஒன்றுதான், ஆனால் அதற்கான காரணங்கள் சில சமயம் குழப்பத்தை ஏற்படுத்தலாம்.திரும்பப் பெறுவதில் தாமதம் ஏற்படுவதற்கான காரணங்களில் மிகவும் அடிப்படையான ஒன்று, சரிபார்ப்பு (verification). வருமான வரித் தாக்கல் செய்தால் மட்டும் போதாது, 30 நாட்களுக்குள் அதைச் சரிபார்க்க வேண்டும். இந்தச் சரிபார்ப்பை ஆதார் ஓடிபி, நெட் பேங்கிங் அல்லது கையொப்பமிட்ட ஒப்புகை சீட்டை பெங்களூரில் உள்ள மத்தியச் செயலாக்க மையத்திற்கு (CPC) அஞ்சலில் அனுப்புவதன் மூலம் செய்யலாம். இந்த ஸ்டெப் தவறினால், நீங்கள் தாக்கல் செய்த வரி செல்லாததாகக் கருதப்படும், மேலும் பணம் திரும்பப் பெறும் செயல்முறை தொடங்கப்படாது.சில சமயங்களில், சரிபார்க்கப்பட்ட வருமான வரிகளும் கூட செயலாக்கப்படாமல் இருக்கலாம். பணம் திரும்பப் பெறுவது, செயலாக்கம் முடிந்த பின்னரே வழங்கப்படும். இந்தச் சூழ்நிலையில், வரி செலுத்துவோர் காத்திருக்க வேண்டும். ஆனால் தாமதம் அதிகமாக இருந்தால், வருமான வரி இணையதளத்தில் உள்நுழைந்து, “CPC-ITR” பிரிவின் கீழ் புகார் அளித்து, விரைவாகச் செயலாக்கக் கோரலாம்.மற்றொரு பொதுவான காரணம், தவறான வங்கிக் கணக்கு விவரங்கள். சமீபத்திய ஆண்டுகளில் வங்கிகள் இணைக்கப்பட்டதாலும், ஐ.எப்.எஸ்.சி குறியீடுகள் மாற்றப்பட்டதாலும், பணம் திரும்பப் பெறுவது வங்கிக் கணக்கை அடைய முடியாமல் திரும்பி வரலாம். இது போன்ற சமயங்களில், வரித் துறை மின்னஞ்சல் எச்சரிக்கையை அனுப்பும். வரி செலுத்துவோர் உடனடியாக “My Bank Details” என்ற பிரிவின் கீழ் வங்கிக் கணக்கு விவரங்களை புதுப்பித்து, “refund reissue” கோரிக்கையை சமர்ப்பிக்க வேண்டும்.முந்தைய ஆண்டுகளில் நிலுவையில் உள்ள வரி பாக்கிகள் இருந்தால், திரும்பப் பெறும் தொகை அதனுடன் சரிசெய்யப்படலாம். கணினியே தானாகவே நிலுவையிலுள்ள வரியை, முதலில் வட்டி, பின் அசல் தொகை என்ற வரிசையில் சரிசெய்து கொள்ளும். இதுபோன்ற நிலுவைகளை, வரி செலுத்துவோர் வருமான வரி இணையதளத்தில் உள்ள “Pending Actions” பக்கத்தின் கீழ் சரிபார்க்கலாம்.வருமான வரித் தாக்கலில் உள்ள வரி கடன் (TDS) விவரங்கள், படிவம் 26AS அல்லது வருடாந்திர தகவல் அறிக்கை (AIS) ஆகியவற்றுடன் பொருந்தவில்லை என்றாலும், பணம் திரும்பப் பெறுவதில் தாமதம் ஏற்படலாம். இத்தகைய சூழ்நிலையில், குழப்பம் தீர்க்கப்படும் வரை வரித் துறை பணத்தைத் திரும்பப் பெறுவதை நிறுத்தி வைக்கும். இந்தச் சிக்கலைத் தீர்க்க, வரி செலுத்துவோர் CPC-யிடம் புகார் அளித்து, சரிசெய்ய வேண்டும்.