ஹெச்-1பி விசா கட்டண விவகாரம்: டிரம்ப் அரசின் முடிவால் பதற்றத்தில் அமேசான், கூகுள் ஊழியர்கள்!

ஹெச்-1பி விசா கட்டண விவகாரம்: டிரம்ப் அரசின் முடிவால் பதற்றத்தில் அமேசான், கூகுள் ஊழியர்கள்!

டிரம்ப் அரசின் $100,000 ஹெச்-1பி விசா கட்டண அறிவிப்பால், அமேசான், கூகுள், மைக்ரோசாஃப்ட் போன்ற பெரிய நிறுவனங்கள் தங்களது ஊழியர்களை அவசரமாக அமெரிக்காவிற்குத் திரும்ப அழைப்பதாகச் செய்திகள் வெளியாகியுள்ளன. சமூக வலைதளங்களில் பரவி வரும் இந்த நிறுவனங்களின் உள்நாட்டு சுற்றறிக்கைகள் பெரும் பரபரப்பை ஏற்படுத்தியுள்ளன.இந்த செய்தியை ஆங்கிலத்தில் படிக்கடிரம்ப் நிர்வாகத்தின் புதிய அறிவிப்பின்படி, ஹெச்-1பி விசா வைத்திருப்பவர்கள் அமெரிக்காவிற்குள் நுழைய $100,000 (இந்திய மதிப்பில் சுமார் ரூ.83 லட்சம்) கூடுதல் கட்டணம் செலுத்த வேண்டும் என்று கூறப்பட்டது. இந்தக் கட்டணம் ஒவ்வொரு விண்ணப்பத்திற்கும் ஒருமுறை மட்டுமே செலுத்த வேண்டியது என்றும், ஏற்கனவே அமெரிக்காவிற்கு வெளியே இருக்கும் ஊழியர்கள் மீண்டும் நாட்டிற்குள் நுழைய இந்தக் கட்டணம் வசூலிக்கப்படாது என்றும் வெள்ளை மாளிகையின் பத்திரிக்கைச் செயலர் கரோலின் லீவிட் தனது எக்ஸ் பக்கத்தில் விளக்கமளித்துள்ளார்.பெரிய நிறுவனங்களின் சுற்றறிக்கைகள் சொல்வது என்ன?அமேசான், கூகுள், மைக்ரோசாஃப்ட் போன்ற முன்னணி நிறுவனங்கள், தங்கள் ஊழியர்களுக்கு மின்னஞ்சல் மூலம் அவசர சுற்றறிக்கைகளை அனுப்பியுள்ளன. இந்த சுற்றறிக்கைகளின் முக்கிய தகவல்கள்:செப்.21 அன்று அதிகாலை 12:01 மணி (GMT) நேரத்திற்குள் ஹெச்-1பி விசா வைத்திருக்கும் ஊழியர்கள் அனைவரும் அமெரிக்காவிற்குத் திரும்ப வேண்டும். அமெரிக்காவில் ஏற்கனவே ஹெச்-1பி, ஹெச்-4 விசா வைத்திருக்கும் ஊழியர்கள், அடுத்த அறிவிப்பு வரும் வரை வெளிநாடுகளுக்குப் பயணம் செய்ய வேண்டாம். செப்டம்பர் 21-ம் தேதிக்குப் பிறகு, $100,000 கட்டணம் செலுத்தாமல் நாட்டிற்குள் நுழைய முடியாது.இந்த திடீர் அறிவிப்பால், அவசரமாகத் திரும்ப முடியாத ஊழியர்களுக்குச் சவால்கள் இருக்கலாம் எனவும், தேவைப்பட்டால் உதவிகள் வழங்கப்படும் எனவும் நிறுவனங்கள் தங்கள் சுற்றறிக்கைகளில் குறிப்பிட்டுள்ளன. நிலைமையைத் தொடர்ந்து கண்காணித்து வருவதாகவும், கூடுதல் தகவல்கள் கிடைக்கும்போது உடனடியாகத் தெரிவிப்பதாகவும் உறுதியளித்துள்ளன.அமேசான், கூகுள், மைக்ரோசாஃப்ட் வெளியிட்ட சுற்றறிக்கைகள்:அமேசான்: “ஹெச்-1பி விசா தொடர்பான அதிபரின் பிரகடனத்தை நாங்கள் ஆய்வு செய்து வருகிறோம். செப்டம்பர் 21-ம் தேதிக்கு முன் அமெரிக்காவிற்குள் நுழைய அனைத்து முயற்சிகளையும் மேற்கொள்ளுமாறு கேட்டுக்கொள்கிறோம். ஹெச்-4 விசா வைத்திருப்பவர்களும் வெளிநாடுகளுக்குப் பயணம் செய்வதைத் தவிர்க்குமாறு பரிந்துரைக்கிறோம்.”கூகுள்: “ஹெச்-1பி விசா வைத்திருப்பவர்களுக்கு அவசர அறிவிப்பு. புதிய பிரகடனம் ஞாயிற்றுக்கிழமை அதிகாலை 12:01 மணிக்கு அமலுக்கு வர உள்ளது. இது மீண்டும் நுழைவதற்கான நடைமுறைகளில் குறிப்பிடத்தக்க மாற்றங்களை ஏற்படுத்தலாம். எனவே, சனிக்கிழமை இரவுக்குள் நாட்டிற்குத் திரும்ப வர முயற்சி செய்யுங்கள்.”மைக்ரோசாஃப்ட்: “புதிய பயணக் கட்டுப்பாடு குறித்து நாங்கள் ஆய்வு செய்துள்ளோம். செப்டம்பர் 21-ஆம் தேதி அதிகாலை முதல், கூடுதல் $100,000 கட்டணம் செலுத்தாமல் ஹெச்-1பி விசா வைத்திருப்பவர்கள் நாட்டிற்குள் நுழைய முடியாது. வெளிநாட்டில் உள்ளவர்கள் இந்த 28 மணி நேரத்திற்குள் திரும்ப வர நாங்கள் உதவுகிறோம்.”இந்த திடீர் அறிவிப்பு, ஆயிரக்கணக்கான வெளிநாட்டு ஊழியர்களிடையே பெரும் பதற்றத்தையும் பரபரப்பையும் ஏற்படுத்தியுள்ளது.