கணேமுல்ல சஞ்சீவ கொலை சம்பவம் ; வெளியாகி வரும் பல அதிர்ச்சிகரமான தகவல்கள்

கணேமுல்ல சஞ்சீவ கொலை சம்பவம் ; வெளியாகி வரும் பல அதிர்ச்சிகரமான தகவல்கள்

கெஹெல்பத்தர பத்மே தலைமையில் நிகழ்த்தப்பட்ட கணேமுல்ல சஞ்சீவ கொலை செய்யப்பட்ட சம்பவம் தொடர்பில் பல அதிர்ச்சிகரமான தகவல்கள் வெளிப்பட்டுள்ளன.

விசாரணைகளின் போது, இஷாரா செவ்வந்தி என்ற பெண், ஐரோப்பிய நாட்டொன்றுக்கு செல்வது தான் தனது வாழ்நாள் கனவாக இருந்ததாகவும், அந்த கனவை நனவாக்குவதாக கெஹெல்பத்தர பத்மே அளித்த வாக்குறுதியின் பேரில் தான் கொலை சம்பவத்திற்கு உதவியாகச் செயல்பட்டதாகவும் தெரிவித்துள்ளார்.

குறித்த சம்பவத்திற்கான தான் எந்த வகையான பணத்தையும் பெற்றுக்கொள்ளவில்லை எனவும், தன்னை ஐரோப்பிய நாட்டிற்கு அனுப்புவதாக கெஹெல்பத்தர பத்மே கூறிய வாக்குறுதியே தான் கொலைக்கு உதவியதற்கான காரணம் எனவும் இஷாரா செவ்வந்தி தெரிவித்துள்ளார்.

சமீபத்தில் நேபாளத்தில் கைது செய்யப்பட்ட இஷாரா செவ்வந்தி தற்போது கொழும்பு குற்றப்பிரிவு காவலில் வைக்கப்பட்டுள்ளார்.

அவர் விசாரணைகளின் போது, கணேமுள்ள சஞ்சீவ கொலைச் சதி குறித்த பல முக்கியமான தகவல்களை வெளியிட்டுள்ளார்.

மேலும், கெஹெல்பத்தர பத்மே தனது வாக்குறுதியை நிறைவேற்றும் பொருட்டு, இஷாராவுடன் கைது செய்யப்பட்ட ஜே.கே. பாய் என்ற நபருக்கு ரூபா 6.5 லட்சம் வழங்கி, போலி பயண ஆவணங்கள் தயாரித்து ஐரோப்பிய நாட்டுக்கு அனுப்ப ஏற்பாடுகள் செய்திருந்ததாகவும் தெரிவிக்கப்படுகின்றது.

இஷாரா செவ்வந்தி, ஐரோப்பிய நாட்டுக்கு செல்லும் கனவை அடிக்கடி பத்மேவிடம் பகிர்ந்ததாகவும், பத்மே தனது போதைப்பொருள் விற்பனைச் செயல்பாடுகளில் ஈடுபட்டிருந்த போது அவளையும் பயன்படுத்தி வந்ததாகவும் தெரியவந்துள்ளது.

இதற்கிடையில், இஷாரா செவ்வந்திக்கு உதவியதாக கூறப்படும் அலுத்கம காவல் நிலையத்தில் பணியாற்றிய காவல் துறை கான்ஸ்டபிள் ஒருவரை, கொழும்பு குற்றப்பிரிவு கைது செய்து இன்று கொழும்பு தலைமை நீதிமன்றத்தில் முன்னிலைப்படுத்தியது.

அதேவேளை, நேபாளத்தில் கைது செய்யப்பட்ட இஷாரா செவ்வந்தி உள்ளிட்ட ஆறு சந்தேகநபர்கள் 90 நாட்கள் காவலில் வைக்கப்பட்டுள்ள நிலையில், கொழும்பு குற்றப்பிரிவு தலைமை அதிகாரி எஸ்.டி. விஜேதுங்க அவர்களின் மேற்பார்வையில் விசாரணைகள் நடைபெற்று வருவதாகவும் தெரிவிக்கப்படுகின்றது.