அமித் ஷாவின் டெல்லி ஆலோசனையில் அண்ணாமலை ஆப்சென்ட்: ஓ.பி.எஸ், டி.டி.வி பற்றி பேசியது என்ன?

அமித் ஷாவின் டெல்லி ஆலோசனையில் அண்ணாமலை ஆப்சென்ட்: ஓ.பி.எஸ், டி.டி.வி பற்றி பேசியது என்ன?

மத்திய உள்துறை அமைச்சர் அமித் ஷா, டெல்லியில் தமிழக பாஜகவின் முக்கிய நிர்வாகிகளுடன் செப்டம்பர் 3, 2025 அன்று ஆலோசனை நடத்தினார். இந்த சந்திப்பின் முக்கிய நோக்கம், வரவிருக்கும் சட்டமன்றத் தேர்தலுக்கான வியூகங்களை வகுப்பதுதான். இந்தக் கூட்டத்தில், அதிமுகவின் பிளவு மற்றும் கூட்டணி கட்சிகளுக்கிடையே உள்ள பிரச்னைகள் குறித்து பொதுவெளியில் கருத்து தெரிவிப்பதைத் தவிர்க்குமாறு அமித் ஷா, தமிழக பாஜக தலைவர்களைக் கேட்டுக்கொண்டார்.அமித் ஷா, தமிழக பாஜக நிர்வாகிகளிடம் கட்சி அமைப்பை வலுப்படுத்துவதிலும், அதிமுகவுடனான உறவை மேம்படுத்துவதிலும் கவனம் செலுத்தும்படி அறிவுறுத்தினார். குறிப்பாக, ஓ. பன்னீர்செல்வம் மற்றும் டி.டி.வி. தினகரன் ஆகியோர் தேசிய ஜனநாயகக் கூட்டணியில் இருந்து விலகியதாகக் கூறப்படும் நிலையில், இந்த அறிவுறுத்தல்கள் முக்கியத்துவம் பெறுகின்றன.இந்த ஆலோசனைக் கூட்டத்தில், தமிழக பாஜக தலைவர் நயினார் நாகேந்திரன், வானதி சீனிவாசன், தமிழிசை சௌந்தரராஜன் ஆகியோர் பங்கேற்றனர். ஆனால், முன்னாள் மாநிலத் தலைவர் கே. அண்ணாமலை கலந்துகொள்ளாதது பல கேள்விகளை எழுப்பியது. இது குறித்து விளக்கம் அளித்த அண்ணாமலை, ஏற்கனவே ஒரு திருமண நிகழ்ச்சியில் கலந்துகொள்வதாக ஒப்புக்கொண்டதால், டெல்லி கூட்டத்திற்குச் செல்ல முடியவில்லை என்று தெரிவித்தார்.கூட்டத்திற்குப் பின் பேசிய பாஜகவின் மூத்த நிர்வாகி ஒருவர், “டெல்லி தலைமை, ஓ.பி.எஸ்., தினகரன் அல்லது பா.ம.க.வில் உள்ள விவகாரங்கள் (ராமதாஸ் மற்றும் அவரது மகன் அன்புமணிக்கு இடையேயான கருத்து வேறுபாடுகள்) குறித்து யாரும் பேச வேண்டாம் எனத் தெளிவாகக் கூறியுள்ளது. மாறாக, வரவிருக்கும் தேர்தல்களுக்குத் தேவையான கட்சிப் பணிகளைத் தயார் செய்யுமாறு கேட்டுக்கொள்ளப்பட்டுள்ளது” என்றார்.கூட்டணியில் எத்தனை தொகுதிகள் என உறுதியான தகவல் இல்லாத நிலையில், 2026 சட்டமன்றத் தேர்தலில் அதிமுகவுடன் கூட்டணி அமைத்து பாஜக போட்டியிடும் வாய்ப்புள்ள தொகுதிகளை அடையாளம் காணுமாறு அமித் ஷா கேட்டுக்கொண்டார். மேலும், மண்டல மாநாடுகள் நடத்துவது, பூத் கமிட்டிகள் அமைப்பது, மற்றும் கூட்டணி கட்சிகளுடன் உள்ளூர் ஒருங்கிணைப்புக் குழுக்களை உருவாக்குவது குறித்தும் ஆலோசிக்கப்பட்டது. தேர்தல் பிரச்னைகள் குறித்து விரிவான விவாதம் ஏதும் நடைபெறவில்லை என்று வட்டாரங்கள் தெரிவித்தன.