தண்டப்பணத்தில் விடுவிக்கப்பட்ட இந்திய மீனவர்கள்

தண்டப்பணத்தில் விடுவிக்கப்பட்ட இந்திய மீனவர்கள்

இலங்கை கடற்பரப்பில் அத்துமீறி நுழைந்து மீன் பிடித்த நிலையில் கைது செய்யப்பட்ட 17 இந்திய மீனவர்களையும் தலா 50 ஆயிரம் ரூபா தண்டப்பணத்தில் விடுவிக்க மன்னார் நீதிவான் நேற்று உத்தரவிட்டுள்ளார்.

கடந்த ஞாயிற்றுக்கிழமை (29) அதிகாலை இலங்கை கடற்பரப்பிற்குள் அத்துமீறி நுழைந்து மீன் பிடித்துக்கொண்டிருந்த போது கடல் ரோந்து பணியில் ஈடுபட்ட இலங்கை கடற்படையினர் இரண்டு இந்திய இழுவைப் படகுகளையும் 17 இந்திய மீனவர்களையும் கைது செய்தனர்.

இந்நிலையில் விளக்கமறியலில் வைக்கப்பட்டிருந்த இந்திய மீனவர்கள் தொடர்பான வழக்கு நேற்று வியாழக்கிழமை (10) மீண்டும் விசாரணைக்கு எடுத்துக்கொள்ளப்பட்டதோடு கைது செய்யப்பட்ட மீனவர்களுக்கு 2 வருட சிறை தண்டனையும் 20 வருடங்களுக்கு ஒத்திவைக்கப்பட்ட சிறை தண்டனையும் விதித்துள்ளதுடன் நபருக்கு 50 ஆயிரம்  ரூபா தண்டப்பணம் விதித்து விடுதலை செய்யப்பட்டனர். 

இலங்கைக்கான உயர்ஸ்தானிகர் அலுவலகம் ஊடாக இலங்கை இந்திய கடற்பரப்பில் மீன்பிடியில் ஈடுபடும் தமிழக மீனவர்களை அத்து மீறி இலங்கை கடற்பரப்பில் நுழைந்து மீன்பிடியில் ஈடுபட வேண்டாம் என்ற கண்டிப்பான உத்தரவு வழங்குமாறு நீதிவான் இலங்கைக்கான இந்திய உயர்ஸ்தானிக அதிகாரிகளுக்கு அறிவுறுத்தல் வழங்கினார்.

இந்த நிலையில் விடுதலையான 17 இந்திய மீனவர்களையும் மிகிரியான தடுப்பு முகாம் ஊடாக இந்திய உயர்ஸ்தானிகர் அலுவலக அதிகாரிகள் ஊடாக நாட்டுக்கு அனுப்ப நடவடிக்கைகளை மேற்கொள்ள அதிகாரிகளுக்கு மன்று உத்தரவிட்டுள்ளது.