Post Office: போஸ்ட் ஆபிஸ் வாடிக்கையாளர்களுக்கு குட் நியூஸ்… யு.பி.ஐ மூலம் பணம் செலுத்தும் வசதி அறிமுகம்!

Post Office: போஸ்ட் ஆபிஸ் வாடிக்கையாளர்களுக்கு குட் நியூஸ்… யு.பி.ஐ மூலம் பணம் செலுத்தும் வசதி அறிமுகம்!

இந்திய அஞ்சல் அலுவலகங்கள் இனி டிஜிட்டல் பணப் பரிவர்த்தனைகளை ஏற்றுக்கொள்ளத் தயாராகி வருகின்றன. ஆகஸ்ட் 2025 முதல் புதிய தகவல் தொழில்நுட்ப அமைப்பு அமலுக்கு வருவதன் மூலம், அஞ்சல் அலுவலகங்களில் பணப் பரிவர்த்தனை திறன் மற்றும் வாடிக்கையாளர் அனுபவம் மேம்படும் என்று எதிர்பார்க்கப்படுகிறது.தற்போது வரை, அஞ்சல் அலுவலகங்களில் யு.பி.ஐ (UPI) அமைப்புடன் கணக்குகள் இணைக்கப்படாததால், டிஜிட்டல் முறையில் பணம் செலுத்துவது சாத்தியமில்லை. இந்த நிலையை மாற்றி, நாடு முழுவதும் உள்ள அனைத்து அஞ்சல் அலுவலகங்களிலும் ஆகஸ்ட் மாதத்திற்குள் புதிய செயலி அமல்படுத்தப்படும் என்று அதிகாரப்பூர்வ வட்டாரங்கள் தெரிவித்துள்ளன.”அஞ்சல் துறை தனது தகவல் தொழில்நுட்ப கட்டமைப்பை மேம்படுத்தி வருகிறது. இதன் மூலம், டைனமிக் கியூஆர் குறியீடு (Dynamic QR Code) மூலம் பரிவர்த்தனைகளை செய்யக்கூடிய புதிய பயன்பாடுகள் கிடைக்கும். ஆகஸ்ட் 2025-க்குள் அனைத்து அஞ்சல் அலுவலகங்களிலும் இந்த வசதி அமல்படுத்தப்படும்” என்று ஒரு அதிகாரி பி.டி.ஐ செய்தி நிறுவனத்திடம் தெரிவித்துள்ளார்.ஐடி 2.0 (IT 2.0) திட்டத்தின் கீழ் இந்த புதிய அமைப்பின் முன்னோட்ட சோதனை கர்நாடக வட்டத்தில் தொடங்கப்பட்டுள்ளது. மைசூரு தலைமை அஞ்சல் அலுவலகம், பாகல்கோட் தலைமை அஞ்சல் அலுவலகம் மற்றும் அதன் துணை அலுவலகங்களில் கியூஆர் குறியீடு அடிப்படையிலான அஞ்சல் முன்பதிவு வெற்றிகரமாக செயல்படுத்தப்பட்டுள்ளது.முன்னதாக, அஞ்சல் துறை டிஜிட்டல் பரிவர்த்தனைகளை செயல்படுத்த அஞ்சல் அலுவலகங்களில் உள்ள விற்பனை மையங்களில் நிலையான கியூஆர் குறியீடுகளை (Static QR code) அறிமுகப்படுத்தியிருந்தது. இருப்பினும், தொடர்ச்சியான தொழில்நுட்ப சிக்கல்கள் மற்றும் வாடிக்கையாளர் புகார்கள் காரணமாக, இந்த முறை நிறுத்தப்பட்டது குறிப்பிடத்தக்கது.இந்த புதிய வசதி, கிராமப்புற மற்றும் நகர்ப்புற மக்களிடையே டிஜிட்டல் பரிவர்த்தனைகளை ஊக்குவிப்பதோடு, அஞ்சல் துறையின் சேவைகளை மேலும் நவீனப்படுத்தும் என்று எதிர்பார்க்கப்படுகிறது.