இந்தியா – அமெரிக்கா வர்த்தக பேச்சு: பொதுத் தளம் அமையவில்லை – ஜெயசங்கர் பேச்சு

இந்தியா – அமெரிக்கா வர்த்தக பேச்சு: பொதுத் தளம் அமையவில்லை – ஜெயசங்கர் பேச்சு

பேச்சுவார்த்தை நடத்தக்கூடிய மற்றும் பேச்சுவார்த்தை நடத்த முடியாத விஷயங்கள் உள்ளன என்று வலியுறுத்திய வெளிவிவகார அமைச்சர் ஜெய்சங்கர், இந்தியாவின் ‘இறுதி எல்லைகள் மற்றும் ரெட் லைன்ஸ்’ (bottom lines and red lines) மதிக்கப்படும் ஒரு வர்த்தகப் புரிதலுக்காக இந்தியா அமெரிக்காவுடன் பேச்சுவார்த்தை நடத்துகிறது என்றார். இருப்பினும், “எங்க வர்த்தக பேச்சுவார்த்தைகளுக்கு நாங்கள் இன்னும் ஒரு பொதுவான தளத்தை அடையவில்லை” என்றும் அவர் குறிப்பிட்டார்.டெல்லியில் நடைபெற்ற கௌடில்யா பொருளாதார மாநாட்டின் (Kautilya Economic Conclave) நிறைவு அமர்வில் பேசிய ஜெய்சங்கர், ரஷ்ய எண்ணெய் கொள்முதல் உட்பட இந்தியாவின் மீது ட்ரம்ப் நிர்வாகம் விதித்துள்ள 50% வரிகளைப் பற்றிக் குறிப்பிட்டார். “நான் பிரச்னைகளைக் குறைத்து மதிப்பிடவில்லை, ஆனால் இது உறவின் ஒவ்வொரு பரிமாணத்திற்கும் பரவப் போகிறது என்று நினைக்கும் அளவிற்கு நாம் இதைக் கொண்டு செல்லக்கூடாது… இதை நாம் சரியான விகிதத்தில் பார்க்க வேண்டும்,” என்று அவர் கூறினார்.அமெரிக்கா இந்திய விவசாய மற்றும் பால் சந்தைகளில் அதன் பொருட்களுக்கான அணுகலை கோரி வருகிறது. பிரதமர் மோடி, அமெரிக்காவையோ அல்லது அதன் வரிகளைப் பற்றியோ நேரடியாகப் பெயரிடாமல், தனது சுதந்திர தின உரையில், இந்திய விவசாயிகள், மீனவர்கள் மற்றும் கால்நடை வளர்ப்போரைப் பாதிக்கும் எந்தவொரு பாதகமான கொள்கைக்கும் எதிராக “ஒரு சுவர் போல நிற்பதாக” தெரிவித்திருந்தார்.இந்தியா-அமெரிக்க உறவின் நிலை குறித்துக் கேட்கப்பட்டபோது, ஜெய்சங்கர், “பிரச்னைகள் உள்ளன, யாரும் மறுக்கவில்லை. மேலும், உறவின் ஒரு பெரிய பகுதி உண்மையில் வழக்கம்போல (business as usual) அல்லது சில சமயங்களில் அதைவிட அதிகமாகத் தொடர்கிறது என்றும் நான் சொல்ல விரும்புகிறேன்,” என்றார்.இந்த செய்தியை ஆங்கிலத்தில் படிக்க”இன்று, அமெரிக்காவுடனான எங்கள் பிரச்னைகளில் ஒரு பெரிய பகுதி என்னவென்றால், எங்கள் வர்த்தகப் பேச்சுவார்த்தைகளுக்கு நாங்கள் ஒரு பொதுவான தளத்தை இன்னும் அடையவில்லை என்பதே. அங்கு சென்றடையாததால் ஏற்பட்ட தோல்வி குறிப்பிட்ட வரி விதிக்க வழிவகுத்துள்ளது” என்று அவர் கூறினார்.”கூடுதலாக 2-வது வரியும் உள்ளது, இது மிகவும் அநீதியானது என்று நாங்கள் கருதுகிறோம்… ரஷ்யாவிலிருந்து எரிசக்தியைப் பெறுவதற்காக விதிக்கப்பட்டது. இதைச் செய்த மற்ற நாடுகளும் உள்ளன, அவர்களில் சிலர் தற்போது எங்களைக் காட்டிலும் ரஷ்யாவுடன் அதிக விரோதமான உறவைக் கொண்டுள்ளனர்,” என்று அவர் தெரிவித்தார்.ரஷ்ய எண்ணெய்யை இறக்குமதி செய்வதற்காக அமெரிக்கா இந்தியாமீது விதித்த கூடுதல் அபராத வரியைப் பற்றி அவர் விரிவாகப் பேசினார். அமெரிக்காவின் இந்த நடவடிக்கை போட்டித்தன்மை மற்றும் சந்தை பொருளாதாரத்தின் அடிப்படைகளுக்கு சவால் விடுப்பதாக அவர் கூறினார்.”உங்களுக்கு எரிசக்தியில் விலைக் குறைபாடுகள் இருக்கும்போது, எரிசக்தி மீது தடைகள் இருக்கும்போது, புதுப்பிக்கத்தக்க எரிசக்திக்கு மானியங்கள் இருக்கும்போது, சந்தை பொருளாதாரம் எங்கே என்று நான் என் தலையைச் சொறிந்து யோசிக்கிறேன்,” என்று அவர் கூறினார்.”வர்த்தகம் மையப்பொருளாக இருந்த உலகில், வர்த்தகத்தின் பரிசீலனை இப்போது வரிகளாகிவிட்டது. ஒப்பீட்டு நன்மைகள் மற்றும் போட்டித் தன்மை எங்கே? பல வழிகளில், நாம் அரசியலின் அடிப்படைகளை மட்டுமல்ல, பொருளாதாரத்தின் அடிப்படைகளையும் மறுபரிசீலனை செய்கிறோம்,” என்று அவர் குறிப்பிட்டார். “நாங்கள் பேச்சுவார்த்தை நடத்தி வருகிறோம். இது உலகின் மிகப்பெரிய சந்தையான அமெரிக்காவுடனான வர்த்தகப் புரிதலாக இருக்க வேண்டும். ஆனால் எங்க இறுதி எல்லைகளும் சிவப்பு கோடுகளும் மதிக்கப்படும் புரிதலாக அது இருக்க வேண்டும்,” என்று அவர் திட்டவட்டமாக கூறினார். பேச்சுவார்த்தை நடத்தக்கூடிய விஷயங்கள் உள்ளன, பேச்சுவார்த்தை நடத்த முடியாத விஷயங்களும் உள்ளன. அதைப் பற்றி நாங்கள் மிகவும் தெளிவாக இருக்கிறோம், இந்த உரையாடல் உண்மையில் மார்ச் மாதம் முதல் நடந்து கொண்டிருக்கிறது என்று அவர் கூறினார்.அமெரிக்கா, இந்தியா, ஜப்பான் மற்றும் ஆஸ்திரேலியா ஆகிய நாடுகளை உள்ளடக்கிய குவாட் (Quad) கூட்டமைப்பின் எதிர்காலம் குறித்துக் கேட்கப்பட்டபோது, இந்த ஆண்டு உச்சி மாநாட்டை இந்தியா நடத்தவுள்ளது, அதிபர் ட்ரம்ப் கலந்துகொள்வாரா என்பதில் இன்னும் தெளிவு இல்லை, ஜெய்சங்கர் கவலைகளைத் தணித்து, “குவாட் உயிர்ப்புடன் உள்ளது, குவாட் நலமாக உள்ளது,” என்று கூறினார்.”இந்த ஆண்டு, நாங்கள் 2 குவாட் வெளியுறவு அமைச்சர்கள் கூட்டங்களை நடத்தியுள்ளோம், ஒன்று ஜனவரியில், ட்ரம்ப் நிர்வாகம் ஆட்சிக்கு வந்த பிறகு நடந்த முதல் கூட்டம், மற்றொன்று ஜூலையில்,” என்று அவர் கூறினார்.உலகம் அசாதாரணமான மற்றும் தீவிரமான மாற்றத்தின் காலகட்டத்தை கடந்து வருவதாகக் குறிப்பிட்ட அவர், “கடந்த சில ஆண்டுகளில் ஏற்பட்ட பெரிய மாற்றங்களில் ஒன்று, பல தசாப்தங்களாக வெளிப்புற எரிசக்தித் தேவைகளைப் பற்றி கவலைப்பட்ட அமெரிக்கா, தற்போது சுயசார்பு அடைந்து, உண்மையில் எரிசக்தியை ஏற்றுமதி செய்கிறது” என்றார். இது எரிசக்தி ஏற்றுமதியை அதன் மூலோபாய கண்ணோட்டத்தின் ஒரு முக்கிய பகுதியாக மாற்றியுள்ளது என்றும் அவர் மேலும் கூறினார்.”இன்று ஆயுதங்களின் தன்மை, போரின் தன்மை அடிப்படையில் மாறிவிட்டது. அஜர்பைஜான்-ஆர்மீனியா, உக்ரைன்-ரஷ்யா, இஸ்ரேல்-ஈரான் எனப் பல மோதல்களில் இதை நாம் கண்டிருக்கிறோம். தொடர்பற்ற போர் (contactless war) மிகவும் தாக்கத்தை ஏற்படுத்தக்கூடிய, சில சமயங்களில் தீர்க்கமான முடிவைக் கூட தரக்கூடியதாக இருக்கிறது,” என்று அவர் கூறினார்.அமெரிக்கா, ரஷ்யா மற்றும் சீனா உட்பட உலகின் பல்வேறு பகுதிகள் தங்கள் நலன்களைப் பாதுகாக்க முயற்சிக்கும் நிலையில், இந்தியா அதைத் தாண்டிச் செல்ல இலக்கு வைப்பதாக அவர் கூறினார். “அவர்கள் தங்கள் நிலைப்பாடுகளைத் தக்க வைத்துக் கொள்ள முயற்சிக்கிறார்கள், ஆனால் இந்தியாவுக்கான சவால் என்னவென்றால், இந்தச் சிக்கல்களில் இருந்து நாம் எவ்வாறு உயர்வது?” என்று அவர் கேள்வி எழுப்பினார். இந்தியாவுக்கு முன்னுள்ள பாதை, உற்பத்தித் துறையில் அது இழந்த தசாப்தங்களை ஈடுகட்டுவதைக் குறிக்கிறது என்று அவர் கூறினார்.”இன்று, எங்கள் சவால் உற்பத்தியை உருவாக்குவதே ஆகும். ஏனெனில், பல தசாப்தங்களாக… ஒரு வகையில் நான் அதை இழந்த தசாப்தங்கள் என்று அழைப்பேன். எனவே நாம் பல பகுதிகளில் ஈடுகட்ட வேண்டியுள்ளது, ஆனால் சமகால வாய்ப்புகளை நாம் தவறவிடாத வகையில் அது இருக்க வேண்டும்,” என்று அவர் கூறினார்.”செமிகண்டக்டர்கள், மின்சார வாகனங்கள், புதுப்பிக்கத்தக்க எரிசக்தி, ட்ரோன்கள் போன்ற அரசாங்கம் தற்போது முன்னெடுக்கும் கொள்கைகளைப் பார்த்தால் – நாம் உகந்த கலவையைப் பெற வேண்டும், ஏனெனில் முடிவில் தொழில்நுட்பமே ஒரு பெரிய மாற்றத்தை ஏற்படுத்தப் போகிறது,” என்று அவர் முடித்தார்.